逐漸遠離馬戲班，蝙蝠紳士降落於森林中的某個角落，並放下了冰女王。
冰女王望著自己心愛的男生，她又再猶疑，是否應該解開自己的冷酷，跟愛人說出心底話。
「我覺得自己很幸運... 因為，我找到了一位值得我相救，同時他也願意為我捨身的一個人...」
「我擁有一顆冰封的心，一直只懂把感情收藏；只有你，才可以溶化我的冰冷...」
「感謝你救了我，是你拯救了我的生命，是你讓我的生命變得不再一樣...」
最後，她選擇說了出口；而就在那一刻，她皇冠上的水晶石發出了強大的光芒。
那顆水晶石，自出生的時候便已經跟隨著艾維雅；她一直都把水晶石掛在身上。
原來，只要她解放情感，向自己所愛的人講出真心的話語，水晶石就會啟動...
一束光線從水晶石照射到圓圓的月亮，不斷吸收月光的能量。
冰女王一直在等待愛人的回應，但他還未來得及說話，臉上經已顯示出痛苦的表情。
似乎，光亮的水晶石令他感到抗拒，水晶石發出的光芒令他覺得十分辛苦...
向來，蝙蝠都是在黑夜出沒，月光為牠們提供無窮的能量；
在強大的月光照耀下，蝙蝠紳士背後的力量，也隨之被逼釋放。
他突然獸性大發，表現出兇悍的面容，露出尖牙，不斷拍翼，似是看到了獵物似的。
但他內裡的理智讓他一步一步的往後退，他知道，絕不可以傷害自己所愛的女生。
看到了愛人的真面目，冰女王嚇了一跳，她同樣地一步一步的往後退，遠離蝙蝠紳士。
「終於讓你看到了醜陋的一面... 過往，我在你面前隱藏真相，但我也知道，終會有這樣的一日...」
「我需要奪取生命來補充自己的體力，我的生命根本就沒有愛；只有你，才可以令我重拾愛...」
「感謝你給我這份愛，我也渴望擁有這份愛，但看來，我們註定不能在一起...」
冰女王和蝙蝠紳士，向著兩個不同的方向離開；命運讓他們相遇，卻不允許他們成為戀人...
但是他們都知道，分開，並不代表對方不愛自己；反而，只是不想對方受到傷害...
這個晚上，天空下起雪來；一粒粒白色的雪花在空氣中飄散，就好像在紀念這段奇幻的愛情...
終於，一共五個章節嘅《黑色異幻》故事全部發佈咗啦！以往寫故事，我通常都會響每個章節嘅開首同結尾寫一大堆解說，解釋故事情節。但唔知大家有冇留意，今次第一至四章，我都冇寫到任何解說；其實係因為我想將所有解說留返響最終章先講，廢時影響大家閱讀故事。
好，咁由邊到開始講起好呢？就由角色背景講起啦！響預告嘅時候，我曾經提及，今年嘅故事係同上年嘅《黑色兩路》有關連，但今年整個故事都已經完咗，似乎都冇咩野可以串聯起上年嗰個故事喎！玄機就係響角色背景！
1. 女主角的名字
艾維雅 呢個名字係由兩個英文生字組成嘅，分別係 Ice 同埋 Were；前者固然就代表 冰女王 嘅特質，至於後者就意味 冰女王 嘅內在擁有狼人嘅特質。
2. 男主角的名字
布特凡 呢個名字係由兩個英文生字組成嘅，分別係 Bat 同埋 Vampire；前者固然就代表 蝙蝠紳士 嘅特質，至於後者就意味 蝙蝠紳士 嘅內在擁有殭屍嘅特質。
下，只係名字有啲啲特別意思？咁就叫串聯起上年個故事？當然唔係咁簡單！《黑色兩路》曾經推出過兩個版本嘅結局，一個係講 殭屍黨 勝出，另一個係講 狼人族 勝出。而《黑色異幻》其實係根據 狼人族 版本嘅結局去發展。
3. 冰女王與狼人的淵源
狼人戰臣 雖然贏咗最終之戰，不過佢錯手殺咗自己嘅愛人；佢覺得好痛苦，佢自己一個人去咗森林不斷思索。狼人戰臣 流下悲傷的眼淚，狼人之首孤獨嘅眼淚幻化成白雪；呢場雪，正正就係 艾維雅 出生嗰一刻所落嘅雪，所以佢自出生起經已擁有狼人冷酷嘅特質。
4. 蝙蝠紳士與殭屍的淵源
兩大魔黨嘅最終之章結束後，殭屍詭姬 消失於世界上；吸血殭屍本身係源自蝙蝠嘅特性，殭屍之首嘅精神最後就寄托響蝙蝠身上。仲記得 布特帆 出生嘅時候發生咗咩野事嗎？蝙蝠響屋內靜候佢嘅誕生，然後就拍翼亂飛，所以佢自出生起經已擁有殭屍嘅蝙蝠特性。
5. 註定不能相愛
狼人同埋殭屍雙方係互相仇恨嘅種族，正因為 冰女王、蝙蝠紳士 嘅內在分別擁有狼人以及殭屍嘅特性，佢地被註定唔能夠相愛。假如佢地嘗試響埋一齊，詛咒就會啟動，亦即最終章所發生嘅事。
6. 愛恨交纏的水晶石
仲有一樣串聯起《黑色兩路》嘅物件，就係 冰女王 嘅水晶石。上年，女主角 帆佩兒 曾經送過一條頸鏈俾男主角 維爾；其實，冰女王 嘅水晶石就係嗰條頸鏈嘅化身。不過，因為經歷過 帆佩兒、維爾 之間嘅悲傷，今次呢粒水晶石除咗見證 冰女王、蝙蝠紳士 嘅愛之外，同時亦負責執行詛咒...
故事解說就講完啦，但係整個《黑色異幻》故事都仲有唔少趣事係值得一提嘅！而家就等我逐個同大家講下啦！唔知你響閱讀故事期間，發現到幾多呢啲嘅小趣事呢？
1. 第一章
艾維雅 嘅故鄉其實就係 灰熊山谷，響佢間房望出去，更加可以望到宏偉嘅灰熊山！
2. 第一章
故事一開始，艾維雅 就已經佩戴著水晶石，水晶石更加會發出微微光茫，指響月亮！隨後嘅每一幅故事圖片，都可以見到呢個效果架！
3. 第二章
故事講到 布特凡 出生於貴族家庭，而所居住嘅小鎮就係我地熟悉嘅 美國小鎮大街！
4. 第二章
有另一樣係再次延續上年嘅故事，布特凡 所入讀嘅學校係 貴凡士學院，即係極端化前嘅 詭墳學院！響佢返學嘅嗰張故事圖片可以見到，佢所屬於 歌帆書院，亦即 殭屍黨 嘅前身！
5. 第二章
呢個章節有三幅故事圖片有顯示圓圓嘅月光，每一幅圖片嘅月光有一束光線指向某個方向，其實就係指向 艾維雅 頸鏈上嘅水晶石！
6. 第三章
馬戲班嘅所在地係響 探險世界 嘅森林裡面，艾維雅、布特凡 亦係因為偶然間走到去 探險世界，先會被班主發現！順帶一提，馬戲班嘅觀眾通常都係黎自 美國小鎮大街、灰熊山谷 呢兩個小鎮！
7. 第三章
本身 艾維雅 嘅水晶石係頸鏈黎嘅，但變成 冰女王 之後為免影響造型，水晶石就鑲咗響皇冠上！
8. 第四章
正當班主隆重介紹 斷頭騎士 頭顱嘅時候，斷頭騎士 已經響暗地裡出現於帳幕後面...
9. 最終章
冰女王 嘅眼影有時會神奇地卸咗妝！係因為太趕，我嘅合作伙伴唔記得幫佢畫返眼影，哈哈！
10. 最終章
仔細睇睇 蝙蝠紳士 嘅近鏡，佢嘅圍巾上面有一個 殭屍黨 嘅標記呢！果然同殭屍好有淵源！
今年嘅萬聖節故事大功告成！希望大家會鍾意，亦要感謝各位支持！另一方面，我亦要感謝我嘅好朋友兼合作伙伴，因為佢好努力咁趕工，幫我畫咗好多好靚嘅畫！每次寫好一個完整嘅故事，我都會覺得好有滿足感！唔知我幾時又會心血來潮寫另一篇故事出黎呢？連我自己都唔知道，因為我個人實在太飄忽啦！哈！
咁冰雪女王最後去咗邊？
回覆刪除