Duffy迪士尼小熊 陪伴我走過三年歲月!

Duffy迪士尼小熊 係響2010年嘅 迪士尼雪亮聖誕 活動正式登陸 香港迪士尼樂園 ( 我好似已經講過好多次... )，當時我見到呢隻咁可愛嘅熊仔，慢慢就鍾意咗佢！估唔到，話咁快就過咗三年啦！

響呢三年間，屬於我自己嘅 Duffy家族 不斷擴大，去到而家已經有18位成員！佢地每一隻小熊每一日都陪伴著我，為我帶黎歡樂、幸運，響我嘅生活中扮演著非常重要嘅角色！

又到咗佢地嘅生日，聖誕節又快將來臨，係時候同佢地換下衫啦！首先係 巨大Duffy，大家覺唔覺得呢件禮服好似有啲熟面口呢？冇錯，呢件正正就係 迪士尼雪亮聖誕2013 米奇 所穿著嘅亮紫禮服！ 

呢件禮服本身係我嘅好朋友特別整俾我著嘅，雖然整細咗少少，但係我都有響園內著咗一陣扮 米奇，嘿嘿！返到屋企，我突然諗到俾 巨大Duffy 著下，最後就發現佢比起我更加啱著！

除咗 巨大Duffy，兩隻 大Duffy 都有換上聖誕衫呢！其中一套更加係今年新推出嘅 聖誕精靈服飾！換完衫，再用同樣係響園內最新發售嘅 Duffy頸巾 包圍住佢地，咁就一定唔會凍親啦！

12月2日係 Duffy家族 嘅生日，呢個日期係以我三年前購買第一隻 Duffy迪士尼小熊 嘅日子去訂立嘅；今年嘅12月2日我要返工，放工之後離開樂園，我就買咗一個生日蛋糕返屋企同佢地慶祝！

Duffy 佢地好乖咁坐哂響梳化上面，佢地睇起上黎好開心喎！有朋友問我，點解要咁大陣象買個蛋糕同佢地慶祝？其實係因為我真係好重視佢地，同埋最重要嘅係，我係一個超鍾意食蛋糕嘅人，哈！

今年嘅生日蛋糕係呢個 栗子紫蕃薯蛋糕，之前經過見到都幾想試，所以最後就揀咗佢！

吹完蠟燭就切蛋糕啦！蛋糕入面細少嘅栗子粒，並散發香甜嘅紫蕃薯味，我覺得都幾好食！

上年佢地兩歲嘅時候，嗰陣嘅 Duffy家族 有15位成員，我就同大家分享過每位成員嘅簡介；今年，Duffy家族 再多咗3位成員，而家就等我分享呢3位新成員嘅簡介以及購買日期啦！

16)  情人節Duffy - 香港迪士尼樂園 - 2013年1月20日

17)  復活節小雞Duffy - 香港迪士尼樂園 - 2013年3月7日

18)  幸福歡樂迷你Duffy - 東京迪士尼海洋 - 2013年6月12日

有一樣野我覺得好驚訝，今年我去 東京迪士尼海洋，最後竟然只係買咗一隻 Duffy 返黎！唔知下年去嘅時候我又會唔會忍到手呢？點都好，我相信 Duffy家族 將會繼續擴展！我地下年再慶祝過！