Tho's Dreams 2014的願景!

2014年1月14日，新一年咁快就過咗兩個星期...  每次黎到新一年，唔少人都會同自己講，響黎緊嘅一年入面會有咩新目標；當然，我都有幾個屬於自己嘅2014年目標，而其中一項，就係要重整 Tho's Dreams！而家就等我同大家分享一下有咩大計啦！

一直以黎，我寫Blog都有一個指標，就係要「一日一篇」！但自從上年暑假開始，呢個指標已經被淡忘，再去到 Tho's Dreams 搬家之後，產量就進一步下降...  我嘅首個重整計劃，就係要重新維持產量指標！不過，我都清楚知道自己未必再係好似以前有咁多空閒時間，所以我想將指標改為「兩日一篇」，我將會儘可能每兩日出一篇新文章！

另一重整計劃，係文章轉型！其實，推出每一篇新文章，第一步就係要準備嗰篇文章所需要嘅相片；但因為撰寫內容需要好多時間、心機，所以好多時我準備完所有圖片就會放咗響到，拖好耐先至開始寫...  為見及此，我會嘗試將部份文章改為以相片為主，唔會寫太多無謂嘅描述。雖然話就話相片為主，但我都會確保每一篇文章嘅內容係完整嘅，唔會失去原有意義！

好啦，講完新目標，就輪到2014年值得我期待嘅野！2013年，我最期待嘅全新園區 迷離莊園 經已響5月正式開幕！今年，我最期待嘅，必然就係 香港迪士尼樂園 快將推出嘅夜間巡遊！呢一刻就仲未知道幾時先會登場，但係我已經好緊張，更加為 Tho's Dreams 換上全新主題背景！標題圖片係響 東京迪士尼樂園 欣賞夜間巡遊嗰陣影嘅，相信，到時可以響香港見到咁嘅情境，一定會好感動！

除咗夜間巡遊，黎緊六月嘅 東京迪士尼之旅2014 都令我非常期待；我早前已經預訂咗 東京迪士尼渡假區 嘅酒店房間，一趟全新嘅幸福歡樂之旅快將展開！睇黎，我要快啲寫完 東京迪士尼之旅2013 嘅文章，再開始分享 東京迪士尼之旅2014 前篇！另外，之前提及過嘅神秘之旅亦繼續準備得如火如荼，應該會響暑假期間出發！總而言之，2014年，讓我突破自己，大開「奇妙」眼界！