Tho's Dreams 搬家完成!

終於，我響2013年完結之前完成咗一個拖咗好耐嘅任務，就係 Tho's Dreams 嘅搬家行動！其實我先前一直都有搬，但係之後比較忙，有大約100篇文章未搬過黎；除夕嗰日我不斷搬，最後，響2013年嘅最後幾分鐘搞掂咗，可以話係了結咗一個心願，哈哈！

2013年8月尾，因為Yahoo Blog宣佈會響年尾關閉，我只好決定搬過黎Blogspot呢邊；呢個改變或者會對眾多讀者帶黎不便，事實上，我都覺得好煩，原本好地地又要重新適應全新嘅網誌系統...  另一方面，面對瀏覽量流失，我慢慢都變得開始冇咩心機寫文章...

不過我知道，有網友黎到呢一刻都依然會成日上黎 Tho's Dreams、不論我有幾懶都繼續支持我，其實真係覺得好感動，要再一次衷心感謝你地！趁呢個機會賣下廣告先，近期我出少咗好多文章，但就算我好忙，都會儘可能每日更新Facebook專頁；假如你仲未讚好的話，誠意邀請你讚好，因為嗰邊會多好多即時資訊架！

瀏覽量大幅度下跌的確令我感到好無奈，但係我黎緊將會有一個重整計劃，希望可以令到 Tho's Dreams 回復生氣！( 其實我好似已經講過好多次話要努力返，但每次都係冇咗件事...  希望今次唔會啦！) 下一篇文章將會提及到重整計劃嘅詳情，敬請留意！;)