香港迪士尼樂園 公佈業績, 並宣佈興建第三間酒店!

香港迪士尼樂園 尋日舉行發佈會，公佈咗2013財政年度嘅業績；上年我就好準時咁等睇直播，然後再好詳細咁將發佈會內容寫成一篇文章；不過今年就做唔到啦，因為我尋日響樂園裡面玩緊，冇得睇電視...  唔緊要啦，其實發佈會內容都會有好多新聞媒體報導，而家就等我綜合相關內容，再講下一啲自己嘅個人感想啦！

純利升倍，人次增加

樂園開幕頭六年一直都有虧損，直至去到2012年度先至首次轉虧為盈；黎到2013年度，不單止繼續有盈利，純利更加有2.42億元，比上年增加超過一倍。至於入場人次亦再次破紀錄，全年達740萬人次。見到樂園營運漸入佳境心裡面固然開心，但另一方面就覺得，既然呢個樂園慢慢變得平穩，咁響賺錢之餘都有需要要檢視本身質素，節慶活動、餐飲、商品等等都依然有好多進步空間。


興建渡假區內第三間酒店

不過尋日嘅重點唔係響盈利、入場人次，而係園方終於宣佈興建渡假區內第三間酒店！渡假區內現時嘅兩間酒店分別係 香港迪士尼樂園酒店 以及 迪士尼好萊塢酒店，近年黎呢兩間酒店嘅全年入住率都超過九成，響部份日子甚至會出現供不應求嘅情況，所以係有興建新酒店嘅必要；第三間酒店落成後將會提供約750間客房，令渡假區內客房總數增至大約1750間。





作為一位樂園Fans，知道將會有新酒店，當然想知道究竟會係點嘅樣同埋會用咩主題啦！園方響尋日嘅發佈會展示咗兩張新酒店嘅設計概念圖，而家就等我地睇下啦！新酒店將會以探索冒險為主題，由以下概念圖片可以見到，酒店正門採用原野風格，仲有一條小溪！

除咗750間客房，新酒店亦都會包括三間餐廳以及一個泳池，落成後將會成為渡假區內最大規模嘅酒店。睇睇另一張有關酒店泳池嘅概念圖片，嘩，好似去咗夏威夷咁！相信響呢到游水的話應該可以感受到非常濃厚嘅夏日熱帶風情！

選址方面，第三間酒店會使用現時兩間酒店之間嘅空地，鄰近 迪士尼好萊塢酒店，以下圖片展示第三間酒店嘅確實選址以及整體結構。新酒店預計最快於2017年初開幕。

重溫一下時間線先：2014年 夜間巡遊，2015年 十週年慶典，2016年 鐵甲奇俠飛行之旅，2017年 新酒店！相信 香港迪士尼樂園 嘅未來將會愈趨光明，要繼續努力向前啊！就等我地一齊陪伴住樂園，見證佢踏進新一步！