夜遊樂園, 漫步於巡遊路線上...

巡遊路線，一向都給予我一種特殊嘅感覺。每一日，呢到都會上演充滿活力嘅巡遊表演；路線兩旁都佈滿觀眾，好不熱鬧。但係當入夜後，呢到又會有截然不同嘅景象；人群逐漸散去，日間嘅繁喧消失，只剩下暗淡嘅燈光...  今晚，就等我同大家沿著巡遊路線漫步，一齊睇下會遇到點樣嘅景象...

巡遊路線嘅起端係一道鐵閘，每場巡遊表演就係響呢個位置開始。

向前行，先後會見到 故事劇場 嘅入口以及爆谷售賣車，仲可以隱約找到城堡嘅蹤影呢！

你可以選擇向左轉，進入 明日世界 嘅太空港口；不過我今次就選擇繼續逗留響巡遊路線。

一步一步向前，或者其他人都忙於遊玩，呢到就只係剩下兩旁街燈所發出嘅微弱光芒，甚少人影。

差唔多去到整個樂園嘅正中心，你見唔見到遠處嘅 廣場飯店，同埋 原野劇場 嘅屋頂呢？

轉彎走入 樂園中心廣場，睡公主城堡 響所有人嘅眼前綻放光輝。

右邊係 探險世界 嘅入口，入去森林裡面進行探險好唔好呢？嗯...  都係繼續散步好了。

再次沿著巡遊路線進發，開始進入 美國小鎮大街，周圍都係維多利亞式建築物。

終於見返人群啦！響呢啲時候，你通常會做啲咩？入去商店購物？抑或等待煙花表演？

巡遊路線嘅尾段，環繞 小鎮廣場 走一圈；首先經過 市鎮會堂 嘅前方。

然後經過火車站、動畫藝術廊，出乎意料地，呢個位置係 美國小鎮大街 夜裡較為寧靜嘅角落。

到達巡遊路線終點，平常巡遊演出嘅時候，花車逐架逐架駛進後台，完成表演。

木門關上，巡遊完滿落幕！等等，我突然醒覺呢一刻並非巡遊表演，我太投入於自己嘅幻想當中！

巡遊路線漫步之旅正式結束，踱步期間令我回想...  曾幾何時，每逢 迪士尼黑色世界 活動進行期間，夜光鬼魅巡遊 高漲嘅氣氛都會籠罩整條路線...  不過唔緊要，巡遊路線好快就可以響黑夜中重拾生氣，一場最幻麗嘅光影滙夜間巡遊快將隆重上演！