日本迪士尼雜誌 Disney Fan 2014年3月號 - 甜蜜Duffy特輯

Disney Fan 呢本黎自日本嘅迪士尼雜誌好似已經好耐冇響 Tho's Dreams 出現過，係因為我唔係每一期都會買，係每逢見到一啲自己有興趣嘅專題先會買返黎睇下。今次買咗本2014年3月號，原因好簡單，一睇封面就已經知咩事，哈哈！

一如以往，一打開雜誌就有揭頁，今期係一幅 東京迪士尼樂園 農曆新年活動相片。

Duffy迪士尼小熊 做得封面主角，當然意味住今期係 Duffy 特輯，有多篇同佢有關嘅專題。

唔知大家仲記唔記得，之前 東京迪士尼之旅2013 遊記分享過一項資訊，就係 東京迪士尼海洋 My Friend Duffy 劇場會響2014年初作出更新，原有劇目「Duffy的誕生」會改為「ShellieMay的誕生」；其實而家已經更新左，而雜誌入面都有講到呢項資訊。

同大家介紹 東京迪士尼海洋 情人節產品嘅時候，都提及到有一個叫做「Sweet Duffy」甜蜜Duffy 嘅產品系列；適逢 東京迪士尼渡假區 三十週年慶典，園方都特別將呢個系列擴展成一個節慶活動，響1月14日至3月20日舉行，所以今期 Disney Fan 都有唔少篇幅係講呢個活動。

 不同頁面分別展示各項活動內容，除咗商品目錄，亦有園內餐飲、節慶裝飾等等嘅介紹。

不過我覺得最得意嘅，就係有專欄教授自家製作 Duffy 小食！只要用上少少創意，就算響屋企都可以親手製作款式獨特嘅 Duffy迪士尼小熊 造型食品！

唔單止有朱古力、杯裝蛋糕呢類熱門嘅甜品，估唔到連日式蛋包飯、便當都有！

講完 Duffy，就輪到其他 東京迪士尼渡假區 資訊，相片特集、最新活動情報，應有盡有。

對我黎講，Disney Fan 其中一項賣點就係佢會展示好多商品圖片，啱哂我呢種鍾意買嘢嘅Fans！

講起商品，唔好唔記得日本仲有 迪士尼商店；Disney Fan 都會定期刊登 Disney Store 嘅最新商品。

唔知各位 迪士尼 Fans們鍾唔鍾意儲野呢？呢個介紹Figure模型收藏品嘅專欄，就最適合鍾意儲野嘅朋友！我睇睇下都有啲衝動想買返個返屋企！

呢本雜誌嘅專欄其實都幾齊全，除咗以上嘅資訊之外，亦有一啲關於 迪士尼 動畫、歷史嘅專欄；例如，今個農曆年係馬年，佢地就特別寫咗一篇專題文章介紹不同 迪士尼朋友 馬匹。

另一個專欄就專門介紹日本以外 迪士尼渡假區 嘅資訊，有時候都會見到 香港迪士尼樂園 嘅情報架！

東京迪士尼渡假區 兩大主題樂園嘅春季活動快將開始，相信 Disney Fan 都會有詳盡既報導！我遲啲又要買返黎睇下，因為... 係時候要睇多啲資料，為六月嘅 東京迪士尼之旅2014 做好準備，嘿嘿！