東京迪士尼之旅2014: 再次展開復活節春日巡航!

春臨大地，又係時候展開春日巡航！上個星期五，東京迪士尼渡假區 官方網站公佈咗兩大主題樂園嘅春季活動詳細內容，咁亦都代表我可以開始為六月嘅 東京迪士尼之旅2014 作好準備！唔知，今次又會係一個點樣嘅旅程呢？

今個春天，東京迪士尼海洋 特備活動「米奇和Duffy的春日巡航」將會再一次載譽歸來，讓賓客響園內展開春日旅程！今年已經係佢地連續第三年舉辦呢個活動，究竟會有咩特別呢？

表演方面，我就覺得有少少失望，因為都係沿用返2012年、2013年嗰三個表演；暫時唔知道會唔會響演出嘅時候有少少改動，不過，其實差唔多嘅野連續睇三年都真係有啲悶...

但講到「米奇和Duffy的春日巡航2014」最驚喜嘅地方，就係 Oswald幸運兔子 將會史無前例首次現身於賓客眼前！呢隻兔仔回歸 迪士尼 嘅大家庭之後終於可以同賓客見面，我好心急想見到佢啊！

雖然表演節目就冇咩新意，但係 Duffy迪士尼小熊 今年都有新衫著，另外亦推出咗好多新款主題商品；相信我今年又會收穫豐富啦，哈哈！

上年因為三十週年慶典，所以 東京迪士尼樂園 並無舉辦春季活動；隨住「幸福歡樂年」完滿落幕，東京迪士尼樂園 今年將會舉辦特備活動「迪士尼復活節」。

自從 東京迪士尼之旅2012 經歷過佢地嘅復活節活動，我就深深鍾意咗呢個充滿活力嘅節日！所以，我都非常期待今次嘅「迪士尼復活節2014」！當中最矚目嘅，必然就係全新復活節主題巡遊！

2012年嘅時候介紹過佢地嘅復活蛋尋寶遊戲，好玩得黎仲有小禮物！今年我決定向難度挑戰，玩完普通版再玩進階版，誓要將所有復活蛋逐隻逐隻搵哂出黎！

又睇睇商品，今年 米奇 同佢班好朋友嘅新裝都設計得幾靚，啲鎖匙扣都整得幾可愛；但最吸引到我嘅係... 爆谷筒！米奇造型復活蛋，好趣緻啊！

延續 東京迪士尼之旅2013，今年將再次入住兩間 迪士尼酒店；同樣係 東京迪士尼海洋海景酒店，今次我預訂咗「米奇和Duffy的春日巡航」主題客房，置身於 Duffy 世界訓一晚，感覺會係點呢？

黎到 東京迪士尼樂園酒店，上年我就入住過 小飛俠 主題房間；既然已經體驗童話式嘅房間，今年我就揀左樂園景觀客房，響房間入面望出去，景色一定係非常壯麗架啦！

東京迪士尼渡假區 一共有三間 迪士尼酒店，但似乎我一直都同 迪士尼大使酒店 好似冇咩緣...  今年，我要將呢間酒店都放入我嘅行程當中，不過就唔係響到住，而係黎食自助餐！

睇到上面嗰張相片，大家會唔會覺得 迪士尼大使酒店 同我地香港嘅 迪士尼好萊塢酒店 非常相似呢？佢地都有一間叫做 Chef Mickey 嘅餐廳，所以我都想去搵下東京版本嘅 廚師米奇！

講完 東京迪士尼渡假區 嘅行程，不如又講下渡假區以外嘅野啦！其實今次係我第一次親自設計整個行程，不論酒店、日程都係由我自己計劃，可以自由自在選擇自己想去嘅地方！

我一向都覺得東京係一個好獨特嘅城市，有好多好靚嘅都市景色，亦有好多有趣嘅景點；可以隨意地想去邊就去邊，我會儘可能令自己嘅行程集休閒、購物、啟發性於一身，哈哈！

以上就係今次旅程嘅簡略介紹，而提到嘅兩項 東京迪士尼渡假區 特備活動「迪士尼復活節2014」以及「米奇和Duffy的春日巡航2014」，將於4月2日分別響 東京迪士尼樂園、東京迪士尼海洋 同步啟動，期待活動開始之後會有更多詳盡嘅消息！東京迪士尼之旅2014，六月啟航！