逛逛商城, 然後到 迪士尼商店 大買特買!

先前 迪士尼渡假區線 嗰篇文章就講到，響 東京迪士尼樂園酒店 完成入住手續之後，我返咗過去 東京迪士尼海洋 領取自己同 Duffy迪士尼小熊 嘅合照；然後，因為順路嘅關係，我就去埋 迪士尼商店 黎一個瘋狂購物時間，嘿嘿！ 

迪士尼商店 東京迪士尼渡假區分店 位於購物商城「IKSPIARI」裡面；呢個商城響正 迪士尼渡假區線 渡假區正門車站 旁邊，我由 東京迪士尼海洋車站 坐一個站就到；假如你係由市區搭火車入黎渡假區的話，響JR舞浜站行過去都只需約三分鐘。

話明係商城，當然有好多店鋪，但因為多數都係售賣貴價貨品，我冇深入研究；另外亦有林林種種嘅餐廳，不過我主要都係響返園內用餐，所以亦都冇刻意留意有咩餐廳。

商城有一條位處於室內嘅百老匯時尚大街，到處都係閃爍嘅霓虹燈招牌；呢到更加可以搵到 米奇老鼠 嘅經典動畫電影廣告！

我黎「IKSPIARI」嘅惟一目的只係為咗 迪士尼商店！當時適逢《怪獸大學》即將上映，店內有唔少相關產品，仲要放咗響門口當眼位置！

響市區嗰間 迪士尼商店，都係有啲運氣先買到 Oswald幸運兔子 毛公仔，我冇強求要搵埋 迷你Oswald；而呢到就有好多隻 迷你Oswald，好開心！

講起 迪士尼商店，必然要講埋備受矚目嘅「UniBEARsity 小熊大學」。之前都有文章介紹過，呢個係 迪士尼商店 自家創作嘅品牌，推出咗多款小熊毛公仔、精品。

呢啲小熊除咗得意可愛之外，最特別之處就係佢地以 迪士尼朋友 作為設計藍本；例如，以下呢隻超級巨大熊就係代表著 米奇老鼠，名字叫做 Mocha！現時，呢個品牌響日本都有一定人氣，而響香港嘅知名度亦都慢慢提升緊！

大件事啦！夠鐘再次進園睇夜間巡遊啦！但係我未買完喎！最後，逗留響 東京迪士尼渡假區 嘅第四日，我又走黎買多次野，哈！

呢次仲發現到，原來 迪士尼商店 門外放有《怪獸大學》大眼仔、毛毛 造型塑像！呢兩張相片就送俾咁多位鍾意怪獸嘅Fans們啦！

最後想講多一樣野：之前有網友留言，提到由樂園裡面出黎商城用餐。其實我唔太建議咁樣做，因為兩大主題樂園都有提供多款食品，個人覺得味道都唔錯，而且價錢亦唔會比起外面貴好多，尚算合理；響樂園走出黎一來一回都幾花時間，假如時間唔係好充裕的話，俾貴少少響園內食，慳返啲時間、腳骨力去玩，或者會係一個較好嘅選擇。