東京迪士尼之旅2014: 驚喜的春日探險旅程

2012年、2013年、2014年... 東京迪士尼海洋「米奇和Duffy的春日巡航」咁就黎到第三年啦！而最開心嘅係，我連續三年都有幸去到日本，親身體驗呢個由 Duffy迪士尼小熊 擔當主角嘅春季活動！東京迪士尼之旅2014 快將啟航，究竟今次又會係一個點樣嘅春日巡航呢？

同過往一樣，「米奇和Duffy的春日巡航」主要集中係 東京迪士尼海洋 裡面嘅其中三個主題園區；分別係 地中海港灣、美國海濱 以及 阿拉伯海岸。

活動地點一樣，係咪代表活動內容都只是大同小異呢？先講講表演方面，過往兩年都係每一個主題園區會有一個獨立既春季表演，總共三個；今年有冇改變呢？係冇嘅...

地中海港灣 所上演嘅表演名為 Lido Isle Welcome to Spring，雖然已經去到第三年，但過往兩年都因為天氣影響，我係未睇過一次完整演出嘅，希望今年可以遇上好嘅天氣啦！

去到 阿拉伯海岸，呢到嘅表演叫做 Springtime Surprise；內容講述 米奇、米妮、Duffy、ShellieMay 響到認識咗好多新朋友，仲見識到好多新奇趣怪嘅事物添！

呢個係唯一我響2012年同埋2013年都有完整地睇完嘅春季表演，希望今年會有改動啦，就算只係少少都好丫；老實講，同一個表演連續睇三年，都真係有啲悶架...

最後一個表演係 美國海濱 嘅 Easter in New York：迪士尼朋友 紛紛出場，一齊響呢個大都市開開心心咁迎接復活節來臨！因為 迪士尼朋友 陣容實在係非常強大，所以我覺得係值得睇完再睇！

而 Easter in New York 最特別之處係，每一日都會有一個夜晚嘅場次；當太陽落山之後，亮起各種色彩嘅燈光，感覺又會變得截然不同，所以我更加鍾意響夜晚嘅時候欣賞呢個演出！

或者表演方面就同往年差不多，咁樂園裡面嘅裝飾呢？為配合「米奇和Duffy的春日巡航」，活動期間，園內都種滿多種款式嘅花朵；坐低欣賞花兒綻放，令人感受到春日嘅悠閒氣息...

雖然呢個活動係以春天黎做主題，不過復活節都算係春天嘅一個重要節日嘛，所以園內裝飾都有加入一啲復活節嘅元素；行行下，或者會見到不同款式嘅復活蛋架！

話到明係由 Duffy迪士尼小熊 擔任活動主角，咁梗係唔少得同佢有關既主題佈置啦！周圍都可以見到 Duffy 嘅蹤影，好似我呢一種Fans必然會變得非常興奮！

2013年，東京迪士尼海洋 響活動期間新增咗一個 米奇行李箱尋寶遊戲；今年呢啲行李箱都有再次出現，不過就再無舉行尋寶遊戲，純粹變咗做裝飾佈置。

唔知係唔係因為上年嘅反應不太熱烈，所以佢地今年取消咗尋寶遊戲；雖然係咁，但其實呢啲行李箱真係設計得好有心思，就算冇左尋寶遊戲都可以繼續影相，已經好好！

講到園內裝飾，不得不提嘅係 Duffy迪士尼小熊 拍照熱點！響指定嘅位置，放低自己嘅 Duffy小熊，幫佢影返張靚相，為今次嘅春日巡航留下美好回憶！

今年，園方響不同位置新增更多拍照熱點，佈景亦都比起往年更有規模！究竟，當我嘅 Duffy小熊 去到現場，配合款式多樣嘅春季裝飾，又會構成一個點樣嘅畫面呢？

每年嘅「米奇和Duffy的春日巡航」，米奇、米妮、Duffy、ShellieMay 都會換上全新服飾；最後當然要去到 Cape Cod 漁村，同 Duffy迪士尼小熊 影返張合照啦！咁樣先至算係完美嘅春日巡航！

話說，東京迪士尼渡假區 嘅節日活動通常都係每三年更換一次嘅，「米奇和Duffy的春日巡航」經已踏入第三年，咁係咪即係下年會有新活動嘅出現呢？點都好啦，就等我好好享受埋今次嘅春季之旅；未來嘅野，遲啲先再諗啦，哈哈！