事不延遲，行程開始啦！不過... 響正式出發之前，有一樣好重要嘅事要做！當然就係執行李啦！仲記唔記得 Duffy 嘅故事呢？米奇 要出發去旅行，米妮 就整咗 Duffy，陪伴住 米奇 走遍各地... 而家每次去旅行，不論長短，我最少都會帶一隻 Duffy 陪我，因為呢個亦係其中一個 Duffy 信念！上次去澳門，我就帶咗 大Duffy 陪我，今次就輪到 小Duffy 啦！我仲幫佢戴上頸巾，驚佢凍親嘛！
嘩！轉眼間，我地經已黎到澳門啦！今次我地入住嘅酒店係 銀河酒店，大堂整得好華麗啊！
突然，整個大堂都響起音樂... 點解個水幕會愈升愈高嘅？仲不斷變色！究竟有咩玄機呢？
水幕緩緩下降，一粒閃耀嘅鑽石出現咗！鑽石配合不同顏色嘅燈光效果，發出耀目光芒。
登記後，就上到去我地嘅房間；客房設計時尚，亦都好寬敞，可惜嘅係窗外景觀一般...
小Duffy 一黎到，就已經霸咗張床，試下個枕頭舒唔舒服！睇黎佢地幾滿意，今晚可以訓個靚覺！
安頓好 小Duffy 之後，我地落咗泳池嗰到睇睇，影下相。周圍都整得好靚，感覺上都幾舒適。
呢到見到對面另一棟大樓，都設計得好華麗；金色嘅玻璃窗上面更加睇到我地呢邊棟大樓嘅影像！
太陽落山，我地亦係時候搵野食！爸媽今晚揀咗食西班牙菜，食咗薄餅、牛扒等，味道都唔錯！
食飽之後，就啟程去睇今次行程嘅第一個節目，冬日威尼斯！我地響城區嗰邊慢慢行過去。
途中經過我地入住嘅 銀河酒店；入夜後著哂燈，閃閃生輝，真係幾似一座宮殿！好靚啊！
黎到 威尼斯人渡假村，響戶外睇咗 冬日威尼斯 嘅佈置同埋表演，之後都有響商場行咗一陣。我一直都幾鍾意呢到嘅佈局，同樣係因為設計得好華麗，另一方面係佢地加入咗古典風格！
睇完表演又行咗陣，時候都唔早，呢晚接著落黎嘅活動都集中返響自己間酒店。
先前就由鑽石大堂進入酒店，而今次我地就響另一邊嘅水晶大堂返到黎 銀河酒店。
食糖水時間！呢到竟然有我最愛嘅紫米露，真係好開心！我仲另外加咗三粒湯圓添！
剛才就響人地 威尼斯人渡假村 個商場行咗陣，食完糖水，都響自己酒店個商場行一陣啦！眾多商店中，我最感興趣嘅就係呢個 Jelly Belly 啫喱糖專門店，呢到有好多種不同口味嘅啫喱糖！
見到排到好似彩虹咁嘅啫喱糖，我即時又諗起響 Legoland 網站見到，排到好似彩虹咁嘅積木！雖然我都係比較希望可以自由自在揀積木，不過我今次都貪得意，買咗少少啫喱糖試下食！
商場入面仲有一間戲院，我更加響戲院門口偶遇 無敵破壞王，以及其他響電影內出現嘅角色！
玩咗大半日，響房間舒舒服服訓返覺之後，繼續第二日嘅行程！梳洗後，落咗商場食早餐。
叫咗我都幾喜歡嘅奶油豬仔包；不過最搞鬼嘅係，我地竟然響食早餐嘅時候叫咗個淨魚蛋黎食！
因為下午嘅行程比較緊迫，所以我地出去行咗一陣之後，就返咗酒店商場食午餐！響美食廣場食午餐，自己想食咩就揀咩，而我就揀咗我鍾意嘅 Pepper Lunch 黑椒牛肉飯。
又黎到最重要嘅甜品時間啦！呢到一共有三間甜品店；開咁多間，響到引誘我，搞錯！
最後，我接受咗佢地嘅引誘，每間都試下；不過我同爸媽三個人分，算係啱啱好啦！我地分別買咗士多啤梨烤餅、焦糖燉蛋泡芺，同埋檸檬蜂蜜、綠茶雪糕糯米糍，全部都好好味！
食飽飽，就到今次行程嘅第二個節目，亦係整個旅程嘅焦點，我好期待嘅 鐵達尼號展覽館！是次展覽響 威尼斯人渡假村 入面嘅 金光會展 舉行，於是我地又再次黎到 威尼斯人渡假村。欣賞展覽接近兩小時，睇完之後就去到商場食個下午茶，今次嘅主角係澳門非常出名嘅葡撻。
行程的確係非常緊迫，食完下午茶、休息一陣之後，就去睇最後一個節目，水舞間！睇完表演都已經係傍晚，於是我地就去食返個葡國菜晚餐，當中我最鍾意嘅就係葡國雞，好味道！
節目睇哂，晚飯又食完，都係時候返屋企啦... 搭船離開之前梗係趁最後機會買手信啦，哈哈！
今次嘅澳門之旅的確係非常緊迫，不過又真係好精彩！稍後再同大家分享返有關三個節目嘅感想！
沒有留言:
張貼留言