上次就俾大家睇過我嘅兩份陶瓷作品，豆豆、米奇魔法帽；我之後又整咗一份新作品，生命之樹！生命之樹 係我響呢個課程嘅最後作品，而我創作呢棵 生命之樹 嘅時候係包含咗深層次意義嘅；每一枝樹枝、每一塊樹葉，代表著我生命中嘅每一個重要時刻，呢啲時刻夾夾埋組成完整嘅人生！
其實原先打算創作一份作品係同 迪士尼 無關嘅，但偏偏就冇靈感，所以又搵返 迪士尼 做題材... 而呢棵 生命之樹 Tree Of Life，就係 迪士尼動物王國 Disney's Animal Kingdom 嘅地標！似就唔係好似，我嗰棵樹細好多；但我自己都幾鍾意呢棵樹，所以先至嘗試將佢創作出黎！
一棵樹最重要嘅部份係咩呢？就係樹幹！所以一開始就用一條條樹枝形狀嘅陶泥整咗樹幹出黎！
之後就係樹葉啦！上次有網友話啲陶瓷作品好似朱古力，今次我就覺得呢啲樹葉有啲似咖啡豆！
將樹葉鋪響樹上面，之後就大功告成啦！本身想再整多啲樹葉，可惜夠鐘落堂，咁冇計啦...
我另外留咗一啲「咖啡豆」冇鋪響樹上，有咩用呢？就係稍後用黎造出樹葉散落地上嘅效果！
雖然棵樹整得唔算好靚，但我都好享受整個過程！今次嘅陶瓷創作都會成為樹上嘅一塊樹葉，哈！
2013年4月25日
近期響學校上緊一個同美術、創意有關嘅課程，有機會嘗試用陶瓷黎創作獨特嘅裝飾品！今次係我首次創作陶瓷製品，一開始練習整咗啲杯、瓶子，之後忽法奇想，整咗兩個得意嘅作品！
嘿嘿！講到創作，好多時我都係環繞返自己最愛最熟悉嘅 迪士尼！今次嘅作品都唔例外！有次無無聊聊整咗三個球體出黎，望望下，令我諗起一個 迪士尼朋友！於是我就為佢地畫上笑臉！
下一步就係要整一個彎彎曲曲，有啲似袋子嘅物體；跟住就將三個帶著歡笑嘅球體放上去！
認唔認得係邊個 迪士尼朋友 呢？就係 豆豆！似就未必好似，不過起碼係三粒豆，哈哈！
下個作品就比較高嘅，係 米奇魔法帽！整好咗形狀，就響表面加咗少量圖案，有啲星星、月亮！
今次整嘅並唔係平常見到嘅 米奇魔法帽，而係特別版！我繼續用象徵 奇妙星粉 嘅索帶圍住頂帽！
下一樣要加嘅就係立體星星！先加一粒有四隻角嘅星星，再加另一粒，最後就變成一粒八角星！
大功告成啦！我嘅創作概念係黎自 東京迪士尼海洋 十週年慶典特別版 米奇魔法帽！而家睇返張相，我又一個新概思，就係加返一啲小星星響條 奇妙星粉 索帶上面，應該會再靚啲！
整完頂帽，又再無無聊聊，整咗一支魔法棒！都有 奇妙閃粉 索帶圍繞住，亦有幾粒小星星！
整陶瓷都唔係咁容易架！我都係不斷嘗試先開始熟習起黎，暫時都算係咁啦，之後會再練習多啲！其實響接觸陶瓷前，我以為陶瓷製品通常都只會係一啲容器，原來都可以整好多得意嘅藝術品！但因為我較為喜歡用顏色表達不同含意，今次陶瓷得一隻色，都算係新挑戰！要繼續嘗試先得啦！
沒有留言:
張貼留言