去迪士尼做足準備! - 編制日程好幫手

唔知大家有冇引象，響 香港迪士尼樂園 就嚟開幕嘅時候，香港政府出咗一個廣告，叫做「去迪士尼做足準備」，教大家點去樂園。仲有首好搞笑嘅歌，我到而家都仲記得點唱 =_=  我今次都要做足準備啦！不過今次個「迪士尼」係講緊 東京迪士尼 啊！

無論係 海洋 定 樂園 都有咁多表演，去之前我真係要睇熟哂啲資料先，廢時到最後白白錯失部份精彩表演或好玩既遊樂設施啦！香港個樂園，去過咁多次，咁熟就話一日玩得哂...  但係去到東京，人生路不熟，個樂園又大香港咁多，唔知玩唔玩得哂！

星夢奇緣 新體驗 - 飛碟背後的煙火...

曾經有一次，係 迪士尼黑色世界 嘅晚上嚟嘅，當玩緊 太空飛碟 嘅時候，咁啱開始咗 星夢奇緣 煙花表演。響飛碟上，一路轉，頭上一路綻放璀璨奪目嘅煙花，個感覺真係幾浪漫...

尋日又嘗試了一個全新嘅睇煙花體驗，就係響 明日世界 入面睇煙花！本身響燈花開始前半個幾鐘，見到 馳車天地 入口寫住只係需要等10分鐘。最後，我係俾個牌呃咗架，我出返黎嘅時候，煙花已經開始咗。咁就廢時行出去，響 明日世界 入面睇。

地球日! 提提自己愛護地球!

其實入樂園，都未必只係可以玩架，隨時都會學到野！之前，曾經試過兩次跟學校入樂園參加 YES Program 通識之旅，途中，每一樣嘅樂園事物，轉眼間就變成了教材，縕含箇中意義。

但係係唔係要俾錢參加呢啲課程先可以學到野呢？當然唔係啦！一年一度嘅 地球日 就已經係一個好好嘅例子啦！樂園每年都會舉辦 地球日 活動，宣揚愛護環境嘅資訊。響樂園入面，睇下 地球日 資料板，可以知道一些樂園響環保方面嘅小秘密。

試後遊園 - 又一次下雨天體驗...

昨日終於考完試啦！沿原先計劃，考試一完結就搭車衝入樂園。響樂園入面都遇到好多有趣嘅事，可惜嘅係，又遇上一個下雨天。記憶中，都未試過響樂園入面撞正咁大場雨，好唔方便。亦因為咁，樂園入面少咗好多人。

之前有一篇文章講過下雨中嘅 迪士尼飛天巡遊，尋日仲諗住咁大雨，可能有機會睇下 米奇滴答列車，但係最後都係直接取消巡遊，咩都冇得睇，可以話係一個小遺憾。不過唔緊要啦，最緊要係玩得開心！

驚喜! 遊遍東京迪士尼渡假區兩大樂園?!

最近媽媽又傳來了一個新消息，就係今次日本之旅，我有機會可以玩哂 東京迪士尼渡假區 兩大主題樂園啊！原先只係諗住去 東京迪士尼海洋，因為有我最愛嘅 Duffy迪士尼小熊 嘛！但因為有酒店Package，包兩張成人一天門票，平咗唔少。所以佢話可能會買一張學生兩天門票俾我，第一日我地一家三口去 東京迪士尼海洋，第二天我可以自己入 東京迪士尼樂園，佢地就出市區Shopping行街。

一個月的約定將要過去...

上一次入去 迪士尼樂園 嘅日子係2012年3月26日。當日，同自己講過，未來嘅呢一個月，就專注於考試吧！響當晚離去嘅時候，我同樂園道別，並約定了響一個月後，4月27日再見。

其實以前嘅我，唔算成日入樂園，通常係兩個月一次，最盡都只係一個月一次。但係由上年9月開始，唔知點解入多左好多，平均兩個禮拜一次。我曾經響2月諗過唔再入去住，但係始終都係忍唔住。可能，我就係喜愛樂園入面嗰種愉快感覺，響呢種環境底下單純地放鬆自己。

特別的收藏品 - 香港迪士尼樂園郵票

上次同大家分享過我架 迪士尼線列車模型，今次就有另一樣特別收藏品。就係郵票啦！以下呢張係2005年樂園開幕時，香港郵政 推出嘅紀念郵票。呢張 $5 嘅郵票，除了有整個樂園嘅圖畫之外，仲有我最愛既米奇造型 - 神奇魔法師！

換上新背景主題! 太空山!

話咁快又過了一個禮拜啦！我的考試已經響不知不覺間進入尾聲！只係剩返一個禮拜咋！一個禮拜！好期待4月27日聽到 Time is up 嘅一刻！好啦，又襯星期六有多少少休息時間，上黎寫下Blog啦！

原來，先前的春日主題都已經用了兩個月...  再者，呢排又熱又多雨，似夏天多過似春天，香港的天氣就係咁...咁不如就換下新既背景主題啦！今次冇特別題材，只係用咗 太空山 做主題。

Duffy迪士尼小熊 的春日巡航日誌!

呢排溫書溫到累嘅時候，就會上去 東京迪士尼海洋 個網頁，睇下樂園既資料，為到訪做下準備之餘，就係要幫我打打氣！因為真係諗起就開心，好期待當天既來臨！響日文版官方網頁入面，有一個 Duffy之旅 咁既按鈕，Click左之後就會跳到去一本屬於 Duffy 既春日巡航日誌！

特別的收藏品 - 迪士尼線列車模型

呢個月考試唔入樂園住，所以都冇咩野好分享。近期只好睇下 東京迪士尼海洋 既資料，等自己期待一下。不過篇篇都講日本之旅好似又太悶，就等我分享一下另一啲野啦！

2005年，響 香港迪士尼樂園 開幕既時候，不同機構同樂園方面都推出過好多不同收藏品，為求多方面宣傳樂園。我自己都有兩樣幾特別的收藏品，其中一樣就係 迪士尼線 列車模型了！

有趣可愛的 Duffy迪士尼小熊!

前幾篇文章都主要同六月既日本之旅有關，呢篇講返啲我地香港既野啦！呢排考試，暫時唔入樂園住。呢段期間就只好睇返以前影落既相啦。

而我睇睇下，亦發現一張上年影既相，係響 夢想花園 影既！剛剛同 Duffy Meet & Greet 影完相，佢就要返後台休息一下啦！離開既時候要經過一道閘門，佢自己開閘，行入去，再關返閘。個樣有少少笨拙，但又幾得意幾搞笑，就俾我影低左啦！

無緣入住 迪士尼酒店, 亦無阻我興奮的心情!

媽媽同我講，話今次應該唔會去住 迪士尼酒店 了；因為始終都的確係太貴，最平都好似要大約$3000港幣，其他酒店都只係$1000幾。再者既就係，日本人實在太強了！仲有成2個幾月，好多房間就已經訂滿了！

今次去 迪士尼海洋，原本就當然都去住 迪士尼海洋酒店 啦。全間酒店都係用了傳統英式風格，以海洋為主題，睇官方網頁既相都覺得幾靚。仲適逄有「米奇 與 Duffy 的春日巡航」活動，酒店房卡都換上新設計！

東京迪士尼海洋 - 米奇 和 Duffy 的春日巡航

正當我地 香港迪士尼樂園 呢邊既 迪士尼星級款待 活動舉行得如火如荼，日本方面響4月至6月都有特別活動！東京迪士尼樂園 就有以復活節為題既活動，而 東京迪士尼海洋 更加推出以 Duffy迪士尼小熊 為題既活動！

官方網頁上面寫既係「米奇 和 達菲 的春日巡航」，但係我自己唔太鍾意 達菲 呢個名，所以強行轉返做 Duffy。米奇 同 Duffy 雙雙向著一望無際既大海遠眺，一定係好期待今次既春日巡航啦！

點算啊! 好多 Duffy 產品啊!

作為 Duffy 既發源地，的確係唔同啲！東京迪士尼海洋 有好多 Duffy 既產品都係全球獨家發售架！東京迪士尼 既出品，通常出名靚，比起任何地方都優秀好多。冇錯，呢幾日睇佢地既網站，發現佢地既產品有幾個特點：靚！的確係比香港出品既設計得較好。多！產品真係多不聲數。同埋... 貴！=_=

香港呢邊所賣既 Duffy 商品唔算多，衫亦唔會經常入貨，只會響節日時候入返啲特色啲既衫。咁 Duffy 響香港未算好出名，都明白樂園既考慮。( 農曆新年啲衫到而家都仲未賣得哂！)東京迪士尼海洋 嗰邊，先唔計特別節目，平常已經推出左好多精品！我響官方網頁搵到一堆商品，對以下呢啲比較有興趣...

逛逛超市小發現 - Mickey Apples!

頭先同親戚們一家人食晚飯，食完後返屋企時跟爸媽去了超市，因為媽媽話要買水果喎！一入到超市，就經已係擺放水果既位置；響呢一刻，我竟然發現...  啲迷你蘋果個包裝袋上面竟然係一個又一個 米奇 既樣子！

日本! 迪士尼海洋! Duffy迪士尼小熊!

好興奮啊！好期待啊！平時講呢兩個字，都係講緊即將開幕既 灰熊山谷。但今次唔係，今次係講 日本東京迪士尼海洋！因為如無意外，考完試之後，我同爸爸媽媽，仲有 Duffy，就會去日本旅行！( 希望唔會泡湯啦，雖然正常都唔會。不過我都唔希望最後要刪除返呢個分類 >_< )

細個既時候，東京迪士尼海洋 同埋 東京迪士尼樂園 都去過，不過已經冇哂記憶啦...  其他我今次係想去 迪士尼樂園 多過 迪士尼海洋，因為好似多D野玩。不過我心愛既 迪士尼小熊Duffy 係 迪士尼海洋 先有，咁只好選擇海洋呢邊啦！呢幾日已經不斷睇下 迪士尼海洋 個網站，發現佢地有一個新既 Duffy 巡遊！亦都有特別以 Duffy 為主題既舞台劇，之前都響網上見過啲相，不過而家先知係舞台劇。

考試也能與迪士尼拉上關係?!

真係估唔到，呢排考試，響試卷入面我都能夠與 迪士尼 拉上關係！星期一考左通識，其中有一題問到：「在全球化的過程中，西方文化往往會取代其他文化。你同意嗎？」

我就答不同意，而響寫既時候，就引用到一個有關 香港迪士尼樂園 既例子...香港迪士尼樂園 係來自西方文化既，不過好耐之前，唔知睇邊個節目，就講到當初設計樂園既時候，都有特別考慮到本地人既文化同喜好。迪士尼 方面知道我地香港人有一個特別既喜好，就係影相啦！亦正正因為咁，響 香港迪士尼樂園 入面設計出一個全球獨有既設施：夢想花園，俾賓客響入面同心愛既 迪士尼朋友 影相。

4月降臨 - 迎接復活節!

呢排考公開試，搞到好似對節日都已經麻木了，唔覺有咩特別。就好似黎緊既復活節咁，都係因為見到月曆上 Pooh 同 Tiger 望住隻復活蛋先諗起咋！

Winnie the Pooh Pook-A-Looz 行李牌!

星期一考完通識，下一科數學兩個禮拜後先考，襯有少少時間就寫下Blog啦！原本昨日星期二已經想寫架啦，相都已經上傳左，但係最後都係冇寫到...  今次都係有關 OK便利店 既 Pook-A-Looz 推廣！繼公仔掛飾之後，佢地又出左行李牌，仲有 Pooh！