2012 我最喜愛迪士尼朋友排行榜! 二十位迪士尼朋友!

五月嘅時候出過一篇 我最喜愛的十大迪士尼朋友，事隔半年，係時候要更新一下排行榜啦！我最終都冇將呢個排行榜拖到去2013年，趕得切響2012年最後嘅兩日入面推出，哈哈！今次嘅排行榜會用咗新嘅顯示方式，唔再局限十位 迪士尼朋友，顯示咗更多 迪士尼朋友。原本有18位，但突然醒起有兩位我鍾意嘅 迪士尼朋友 唔記得咗加上去，所以而家係20位！

咁多位 迪士尼朋友 之中，排第一名，我最愛嘅，當然係 Duffy迪士尼小熊 啦！無可取替！小熊維尼 亦都穩守第二位；其餘頭十位我最喜愛嘅 迪士尼朋友 基本上都同上次差唔多。而我先前所講嘅神秘 迪士尼朋友，其實就係前排經已現身嘅 幸福兔子Oswald。新上榜嘅佢竟然一下子就排到去第三位，果然係極速上位！仲有另一位新上榜嘅係 唐老鴨。好啦！我唔講咁多啦！而家事不延遲，請大家欣賞全新 2012 我最喜愛迪士尼朋友排行榜！

登陸612星球, 探索 小王子 的純真世界...

前幾篇文章好似都同迪士尼冇咩關係，因為園內都冇咩特別嘅事發生...  而家我要另覓新題材...  咁首先諗起嘅，就係我自己響生活中所遇到嘅事；我用其他題材寫文章，希望大家唔會覺得悶啦...  呢個月出少咗文章，一黎係因為返工後空餘時間少咗，另一方面亦係因為我諗唔到寫咩好...  可能之後多返少少時間的話，會再寫一個長篇故事，又或者再諗一啲新構思！希望我會諗到啦！

由細到大，我一直都好鍾意睇故事，書本嘅故事又好，電影嘅故事亦好，我都好鍾意睇。雖然每個故事嘅內容都唔同，但佢地都有一個相同嘅特質，就係令自己引發起好多奇想；我每一次睇故事都會幻想故事中嘅情節，亦因為咁，我嘅幻想慢慢就變成咗寫故事嘅呢個興趣。其中有一個故事係我最愛嘅，就係《小王子》，我對佢嘅熱愛令我足足買咗五本內容相同嘅書！

親手製作屬於自己的聖誕玩具士兵!

迪士尼主題公園 Disney Parks 嘅網誌響早前發表咗一篇關於 聖誕玩具士兵 紙工藝嘅文章；我急不及待下載咗落黎，整咗一個屬於自己嘅 聖誕玩具士兵！大家會唔會覺得佢有啲熟口面呢？

聖誕快樂! 祝大家有一個開心愉快嘅節日!

今日就係聖誕節啦！今次搵黎一班 Duffy迪士尼小熊，代表 Tho's Dreams 同大家講聲聖誕快樂！

與 無敵破壞王 展開遊戲世界歷險旅程!

昨日就話用 迪士尼Fans 嘅身份去做一件事，完成之後就更加覺得各位 迪士尼Fans 一定要去做！究竟係咩呢？就係去咗睇 迪士尼 製作嘅最新動畫電影《無敵破壞王 Wreck-it-Ralph》！

忙透的一星期... 過去了!

今個星期返咗五日工，真係有啲累，但同時又好滿足！因為我視每樣工作都係一個學習嘅機會！特別係當我幫助到每一位賓客，見到賓客嘅臉上展現笑容，就算係微不足道，我自己都會好開心！返咗三個幾星期，店內大部份工作都開始上手；不過有時候都會撞下板...  唔小心做錯野...  但係每一次撞板係對我一個好好嘅教訓，提醒自己下次唔好再錯，俾我響失敗之中汲取經驗。

傳聞中的世界末日來臨了...

2012年12月21日來臨了...  傳聞話，呢一日將會係末日，世界將會終結，人類將會滅亡...  唔知大家信唔信呢個傳聞呢？我好似係響中二嘅時候第一次聽呢個傳聞，當時真係有啲擔心...  但日子一日一日咁過，我並沒每一日都擔驚受怕；相反，我覺得呢個傳聞只係俾傳媒過於吹捧。

你有冇諗過，如果真係世界末日，會係變成點樣嘅呢？世界變得黑暗，再睇唔到任何光芒？響我自己嘅心入面，其實我有一次，真係覺得眼前嘅景像好似末日；就係之前嘅 風暴下的樂園...  不過，同一時間，我亦都覺得呢個情景好魔幻，令我慨嘆呢個世界的嘅瀚，自己嘅渺小。

Mission S2: 輕輕鬆鬆完成任務!

隔咗兩日冇出新文章，感謝大家體諒！今晚，Mission S2 終於都可以上映啦！

任務時間：

2012年12月16日  星期日  上午09時35分

任務背景：

迪士尼特務，上星期進行任務時，你未能收集其他兩款聖誕新貼紙！今天要再接再厲！是次任務的時間比較鬆動，可以輕鬆地進行，但請緊記於上午10時15前離園啊！

任務路線：

路線已經顯示於任務介面中，今次範圍只包括 美國小鎮大街、探險世界、灰熊山谷。

Duffy迪士尼小熊 曲奇餅 驚喜登場!

昨日返工前都有花少少時間入樂園進行 Mission S2，不過更驚喜嘅係，響偶然間搵到新商品！樂園推出咗全新 Duffy迪士尼小熊 盒裝曲奇餅，好開心啊！我當然諗都唔諗就買咗一盒啦！

DIY個人化 - 雪亮聖誕徽章 X 黑色世界搖搖

奇妙處處通 會員獨家專享嘅聖誕徽章套裝，其中嘅巨型聖誕樹徽章，容許購買後使用個人化服務；不過我最後就冇選擇到使用個人化服務，返到屋企就自己DIY，寫咗啲字句響個聖誕樹徽章上面。

奇妙處處通 會員專享獨家 迪士尼徽章, Vinylamtion!

上星期六好興奮咁買咗好多野，其實仲有一樣未分享，就係 奇妙處處通 會員專享聖誕徽章套裝！原本都仲諗緊買唔買，覺得佢要二百幾蚊有啲貴，但見到實物幾靚，所以最後就買咗啦！

Mission S: 決戰廿分鐘!

上次提及到我星期六、日連續兩日，返工之外都有入一入樂園，咁星期日點解又會入樂園呢？就係要進行呢個Mission S！究竟係咩黎嘅呢？我當日就冇拎相機，不過就用咗舊相黎整以下圖片。啲圖片特別整到好似任務介面咁，好得意架，哈哈！而家就將整個任務過程送上俾大家睇睇！

任務時間：

2012年12月9日  星期日  下午12時40分

任務背景：

迪士尼特務，有情報顯示，這一日樂園會有新一批聖誕貼紙推出，請收集所有新貼紙！請用最短時間，在園內收集聖誕貼紙，時間限制為20分鐘，你必需於下午1時前離園。

任務路線：

路線已經顯示於任務介面中，你需要橫跨 香港迪士尼樂園 全部六個主題園區。

夜遊樂園, 漫步於每一個主題園區...

返工之後可能因為未習慣啦，好多時都好累...  所以上星期寫少咗文章，但今個星期會正常返架啦！返咗四日工，學咗好多新野；試過第一次落單、派貼紙、交換徽章等...  全部都係係好特別嘅體驗。下星期仲會有機會嘗試響巡遊期間幫忙維持秩序，好期待！仲可以穿上 米奇寶石背心！哈哈！

其實本身上星期二、四都想收工後入一入樂園，不過收20:00，最終都打消咗呢個念頭。最後，響星期六就入咗樂園，因為要拎時間表！嗰日唔拎就冇機會架啦！好彩嗰日收18:00咋！

迪士尼雪亮聖誕2012 網上活動 -「映像。微故事」

樂園方面昨日響網上開始咗一個活動，名為「映像。微故事」，鼓勵大家用相片創作一個小故事。我自己其實唔係咁鍾意太短嘅故事，因為會規限故事嘅創作，我創作嘅故事通常都會有一定長度。不過，既然樂園主動推出呢種類型嘅活動，我都會參加以表支持嘅；昨晚我已經遞交咗作品啦！

非一般的奇妙體驗, 正式展開!

上星期二響 迪士尼大學 畢業，事隔一個禮拜，聽日我終於會正式去到自己嘅工作地點實習啦！真係好期待啊！響實習嘅過程中唔知又會學到啲咩新嘅知識呢？好想快啲與不同嘅賓客見面！作為演藝人員，其中一個任務就係要為賓客帶來奇妙體驗，但我自己都可以從中感受到奇妙感覺；響神奇王國入面創造奇妙，同時又能夠感受奇妙，我稱呢種雙重魔法為非一般嘅奇妙體驗！

今個星期二、四、六都會返工，不過下個星期要考試，只係需要返星期日、四，安排得好體貼。好多網友先前知道我成為演藝人員後都有留言，好多謝大家咁關心我！希望可以響樂園見到大家！其實樂園入面唔知有幾多位演藝人員叫Thomas，而家就縮窄範圍，俾個提示方便大家搵我啦！提示：六個園區嘅演藝人員戲服之中，我覺得有兩款係特別靚嘅，而我今次就有幸著上其中一款！我應承過自己要抱住純真嘅態度做好呢個角色，我要加油啊！各位朋友，我地約定樂園入面見啦！

Today is Duffy's Birthday! 今天是Duffy的生日!

迪士尼 方面並無為 Duffy迪士尼小熊 訂立一個生日日期，不過，今日係我地 Duffy家族 嘅生日啊！12月2日呢個日期係點訂出黎嘅呢？其實我係響2010年12月2日買咗屬於我嘅第一隻 Duffy 小熊；於是，我就將12月2日訂立為整個 Duffy家族 嘅生日，一次過幫屋企嘅每一隻 Duffy 慶祝生日！

上年我就冇特別響呢一日為佢地慶祝，因為我都唔記得咗佢地幾時生日，係前排睇返相片先知。轉眼間，我嘅 Duffy家族 已經兩歲生日啦！上年唔記得慶祝，唔緊要！今年就等我地大肆慶祝啦！

LEGO X TimesSquare - 漫步於積木聖誕村

星期三上完堂後去咗銅鑼灣食晚飯，之後終於有機會去到 時代廣場 欣賞 LEGO 積木聖誕村啦！上次分享過 LEGO 響我成長中有咩意義，鍾意 LEGO 嘅我又點可以錯過呢次展出呢？

2012十二月份焦點迪士尼朋友 - Duffy迪士尼小熊

又到一個月嘅開始，又係時候推出每月焦點 迪士尼朋友 月曆啦！今個月當然要配合返聖誕節啦！其實我覺得上個月 反斗奇兵 嗰張月曆，幅圖揀得唔係咁靚，所以我今次特別揀咗一張靚啲嘅！

呢排 迪士尼雪亮聖誕2012 正在舉行得如火如荼，亦都特別多關於 Duffy迪士尼小熊 嘅文章；所以，今個月嘅焦點 迪士尼朋友 非佢莫屬啦！雖然響我心目中，佢每日都係焦點 迪士尼朋友！同樣係有16:9版本同埋4:3版本，大家可以選擇適合自己電腦屏幕嘅版本；以下係一般月曆。

聖誕節相片故事 -《Duffy的聖誕願望》

先前提及過一篇以聖誕節為主題嘅短篇故事，今日正式發表啦！主角就係 Duffy 迪士尼小熊！形式同之前嘅《黑色兩路》有啲唔同，今次故事嘅焦點會係相片，而唔係仔細嘅文字描述。鍾意上次《黑色兩路》嘅朋友今次可能會有啲失望，因為呢個故事劇情比較簡單，情節冇咁吸引。今次我係特別帶埋 聖誕小Duffy、聖誕迷你Duffy 入園，響園內取景，事先為故事影好哂相架！希望大家會鍾意今次嘅演繹模式啦！而家事不延遲，立即就為大家送上《Duffy的聖誕願望》！

迪士尼雪亮聖誕2012 廣告 - 樂園不斷成長, 帶動聖誕奇想!

本身話今晚有一篇文章發表，不過返到屋企見到園方出咗最新廣告，所以原本嘅文章惟有延後啦...  雪亮聖誕2012 開始咗接近兩星期，樂園終於推出最新電視廣告啦！響YouTube可以率先欣賞到。

     

2012年11月26日 - 演藝人員角色的開始

呢篇文章特別為2012年11月26日上午9:00留個紀念；因為響呢一刻，我正式入職成為演藝人員啦！由而家開始，我已經擔當緊 香港迪士尼樂園渡假區 演藝人員嘅呢個角色，夢想能夠實現，好感動...

朝早返到 香港迪士尼樂園渡假區，去 迪士尼大學 上堂，聽咗好多關於 迪士尼 嘅歷史同埋傳統。就算撇開演藝人員嘅身份，作為一位 迪士尼 粉絲，可以聽到咁多有用資料都係一個好難得嘅機會！今日亦獲得屬於自己嘅演藝人員名牌！以後每當我戴起名牌，我都會提醒自己要做好呢個角色！

Duffy家族 迎接聖誕節的來臨!

聖誕節係一個充滿歡欣嘅節日，雖然仲有一個月，但係 Duffy 佢地都好期待呢個節日嘅來臨啊！就等我同大家分享下，佢地點樣好好裝扮自己過佳節，同埋收到啲咩聖誕節禮物啦！

樂園事物仔細尋 - 大街商店內的精緻小屋

又有一排冇出 樂園事物仔細尋，上次已經係分享 詭墳學院 校訓，但其實呢排真係尋唔到啲咩...  哈哈，上星期四行下行下，又咁啱俾我響 大街糖果店 發現到一樣之前留意唔到嘅物件！佢放咗響到咁耐，又冇咩理由留意唔到丫...  可能我成日俾啲商品吸引住，所以去到而家先注意到。

迪士尼雪亮聖誕2012 - 聖誕主題徽章

上星期四趁 雪亮聖誕2012 剛剛開始，買咗兩個聖誕節嘅主題徽章，亦買咗一個樂園標誌徽章。由八月開始儲，之後不時都會買幾個；去到而家，估唔到話咁快我就已經擁有二十幾個徽章啦！

突如其來的一次遊園, 體驗奇妙...

星期一突然收到電話，於是星期二就去咗面試；完畢之後，我當然亦入咗樂園玩一陣啦，哈哈！上次就見唔到 奇奇、帝帝、高飛、布魯托，呢日入園後終於見到兩隻穿上全新聖誕裝嘅花栗鼠仔啦！

緊貼追蹤迪士尼主題公園推出最新 Duffy 商品!

呢排我通常都會留意一下美國方面為各個 迪士尼主題公園 Disney Parks 所推出嘅 Duffy 商品；因為好多時佢地推出嘅野 香港迪士尼樂園 都會一齊推出；我地都可以買到，所以更值得留意！不過亦唔排除香港偶然會有獨家商品，之前推出嘅 Duffy Passport 套裝 就係一個好例子。相反，東京迪士尼海洋 嘅商品我就少啲留意，因為 香港迪士尼 冇得買，得個睇字又何必呢。XD

夢想終於實現! 即將擁有一個屬於自己的名牌!

園方響 迪士尼雪亮聖誕2012 活動期間再次推出全新聖誕主題個人化名牌，上面仲有一個小徽章！我特別鍾意呢個名牌上面嘅雪花效果，有啲閃粉閃閃下，好靚啊！最後我又買咗一個俾自己...

2012年 Duffy迪士尼小熊 過聖誕!

呢篇文章我係設定咗時間發表嘅，其實我昨晚就已經寫好咗...  咁點解我要特別設定時間發表呢？響呢一刻，2012年11月20日上午11:00，我正身處 香港迪士尼樂園渡假區 做緊一樣好重要嘅野；我好希望 Duffy 可以一直陪伴住我，俾幸運我...  究竟我做緊咩呢？今晚我返屋企後再同大家分享！

踏進聖誕小鎮大街, 感受充滿歡欣的節日氣氛!

唔好意思，本身諗住星期五出嘅呢篇關於 雪亮聖誕2012 首日嘅體驗文章，最後遲咗幾日先至出...  但係要請鍾意 Duffy 嘅朋友再等多一日啦，因為響呢篇文章入面，Duffy 係唔會出現嘅...  我咁鍾意 Duffy，而 Duffy 又同聖誕節特別有淵源，所以佢係值得有一篇專題文章！聽日會出架啦！

Duffy 的生日禮物及聖誕節禮物, 空運到港!

上星期四響樂園同網友見咗面，拎咗 Duffy 嘅禮物；原來啲禮物都幾大份，真係麻煩哂嗰位網友！不過我唔想咁早就送啲禮物俾佢地，所以拎到返屋企影張相之後就收埋咗，Duffy 佢地仲未知架！

米奇 米妮 生日快樂! 一切就是從84年前的今天開始...

除咗 反斗奇兵大本營 之外，今日更加係兩位著名 迪士尼朋友 ─ 米奇、米妮 嘅生日啊！佢地兩位係響1928年嘅今日首次登上大銀幕！八十四個年頭就咁就過去，響到祝佢地生日快樂！

回想過去，而家整個 迪士尼 嘅業務，無論係主題公園、電影等等，全部都係由呢兩隻老鼠開始。佢地兩位更加成為世界上最受歡迎嘅卡通人物，響八十四年間亦都試過以不同嘅造型出現；之前響暑假前，園方就用過各種 米奇 嘅造型黎做樂園時間表嘅封面，就等我地趁今日懷念一下！

反斗奇兵大本營 開幕一週年!

2011年11月18日，香港迪士尼樂園 擴建項目中嘅第一個園區正式開幕，就係 反斗奇兵大本營！話咁快，一年就已經過去，反斗奇兵大本營 為我地帶黎好多嘅歡樂！唔知邊一次令你最深刻呢？

雪花紛飛, Duffy 帶你進入夢幻聖誕夜!

迪士尼雪亮聖誕2012 正式開始，Tho's Dreams 再次換上全新標題圖片啦，Duffy 又再成為主角！

迪士尼雪亮聖誕2012 正式開始! 充滿驚喜的 大街閃雪亮燈!

終於等到啦！迪士尼雪亮聖誕2012 今日正式開始！今日一早就入咗去樂園體驗濃厚嘅節日氣氛！今日響樂園入面都發生咗好多事，有好多野都想同大家分享，之後幾日會陸續慢慢放上黎。但係今晚有一樣野必定必定要即刻同大家分享，因為呢樣野實在係太奇妙啦！我不得不讚！

之前知道今年活動同上年冇咩大分別之後，真係有啲失望，只能夠盼望會有啲特別嘅驚喜啦...  估唔到今年嘅 大街閃雪亮燈，正正就為我地送上一個意想不到嘅驚喜，令整個晚上充滿奇妙感覺！

永不放棄 ‧ 夢想重生 ‧ 繼續前進!

聽日就係11月15日，亦即係 迪士尼雪亮聖誕2102 開始嘅日子，我聽日將會再次入樂園玩足全日！之前就話過我申請咗做商品部嘅季節性兼職演藝人員，過去兩個幾禮拜我都好落力地睇實部電話；不斷等待佢地打電話黎叫我面試，不過佢地並冇打黎，而我響樂園招聘網頁亦再搵唔到有關職位。咁我諗應該係佢地已經請夠人，亦即係話我暫時都未能夠成為一位 香港迪士尼樂園 嘅演藝人員...

安座家中, 與梅莉達公主展開幻險森林之旅!

其實園方除咗為 奇妙處處通 會員提供多項園內專享優惠之外，近期都好積極爭取更多園外優惠；之前響 奇妙處處通 會員專頁入面見到，園方又為我地一班會員提供一個新嘅優惠，真係太好啦！由11月13日至12月15日，會員去到指定商鋪購買 勇敢傳說之幻險森林 DVD或BlueRay一隻嘅話，即時會有$10及$20優惠，而同時仲可以獲得贈品，勇敢傳說之幻險森林 2013年曆簿一本！

粉飾前的 邊域山谷, 與你拆解前後對比!

繼續無無聊聊系列，上次就分享咗我響遊戲入面以 灰熊山谷 為設計藍本自製出黎嘅 邊域山谷。見大家好似都有啲興趣，所以今次就同大家睇下佢以前嘅樣！拆解一下佢粉飾前後嘅對比！冇錯，你冇睇錯，以下張圖正正就係響粉飾前嘅 邊域山谷，一個完全唔似主題園區嘅地方...

Duffy迪士尼小熊 收到他們的萬聖節禮物!

星期五晚上約咗嗰位朋友見面，拎咗之前空運到港嘅 Duffy 萬聖節禮物，仲同佢傾咗好耐計添！佢同我講咗好多今次響 東京迪士尼渡假區 嘅經歷，我又講返我之前嘅經歷，傾得好開心！但係嗰晚返到屋企都好夜啦，所以我決定星期六朝早先送俾 Duffy 佢地，一起身就即刻俾佢地睇。

回望昔日的 迪士尼雪亮聖誕...

昨日重新整理過電腦入面嘅相，又睇返好多以前嘅相，當中都有啲係關於 迪士尼雪亮聖誕 嘅...  之前試過響呢個Blog講返前幾年嘅 迪士尼黑色世界，既然係咁，今次就講下昔日嘅 雪亮聖誕 啦！

再睇返以前啲相，發現自己影相真係一般，再加上部機太舊，啲相有啲都好朦，真係唔好意思啊！雖然啲相未必係好完美好靚，不過都正如我前排咁講，相片所記載嘅故事先至係最重要嘅！特別係因為我以前唔係好似而家咁成日入樂園玩，有好多野都已經唔係太記得清楚，慢慢忘記咗；而呢啲相就正正幫我紀錄低以前見過嘅野，發生過嘅野，好讓我黎到今日都仲可以諗返起以前...

自製樂園地圖 - 更新迷離莊園小路!

黑色世界 完咗，雪亮聖誕 又未開始，呢排都冇咩好講，搞到而家講啲野都係一啲無謂...  但係希望我自己同大家都可以撐著！雪亮聖誕 下星期四就會開始，咁就會有返多啲話題講架啦！

前幾日無無聊聊，諗起樂園方面終於都統一使用 迷離莊園 小路版本嘅地圖，不如我又試下整先！原來搵啲樹淨係黎遮住 迷離大宅 都唔係咁簡單，因為要好小心咁砌返一條合適嘅小路出黎。

以灰熊山谷為創作藍本的自製園區: 邊域山谷!

響好耐之前，我就同大家分享過我用電腦遊戲創作咗 香港迪士尼樂園 入面嘅 沖天搖控車。事隔接近一年，隨住 灰熊山谷 開幕，我就特別以 灰熊山谷 為藍本，創作出一個全新園區！

Duffy迪士尼小熊 穿上華麗的瘋帽子服裝!

昨日入樂園嘅時候，終於買咗 瘋帽子套裝 俾 Duffy 做禮物啦！返到屋企就即刻幫佢換咗套衫！又同大家玩個遊戲先，你認唔認得出，呢隻 大Duffy 係 香港迪士尼 嗰隻定係 東京迪士尼 嗰隻呢？

黑色力量消散... 溫馨的節日快要又再來臨了!

響每次嘅特別節慶活動開始之前，園方會慢慢逐步逐步響樂園入面設置不同嘅節日裝飾。不過，最令我佩服嘅係，響每次活動完結嘅之後嗰日，所以佈置已經可以消失得無影無蹤。佢地驚人嘅速度，之前已經見識過...  但昨日一入去就見到一樣野，真係令我佩服得五體投地！估唔到短短三日，園方清走哂所有 黑色世界 嘅裝飾之餘，更加已經將巨型聖誕樹豎立響大街上！

Tho's Dreams 一週年紀念特輯 - 香港迪士尼樂園

呢啲相片同上一篇 東京迪士尼渡假區 紀念特輯一樣，都係曬咗出黎，放咗響我本 Duffy 相簿入面。有啲係上一次曬嘅，有啲就係同埋東京嗰啲相一齊新曬嘅，而家一次過放上黎同大家分享！

Tho's Dreams 一週年紀念特輯 - 東京迪士尼渡假區

今年嘅 日本迪士尼之旅 係我寫Blog之後第一次去海外嘅 迪士尼渡假區 玩，真係好開心！特別係去完返黎可以好詳細咁響自己嘅Blog寫返每一樣見過、玩過嘅野，同大家分享。前排我終於記得要曬相，揀咗啲相曬出黎，放落響 東京迪士尼海洋 買嘅 Duffy 相簿入面！嗰本相簿得56個位，只可以揀啲精選嘅相，揀到我辛苦，因為我好多相都好鍾意！>_<

Tho's Dreams 一週年紀念特輯 - Blog主題圖片

以前都講過，因為我自己都幾鍾意整下圖，所以我不時都會轉主題圖片，佈置好自己個Blog！響過去嘅一年我都整過好多張標題圖片，今次就趁一週年同大家回顧一下呢個Blog曾經係點嘅樣！

2012年11月3日 - Tho's Dreams 一週年!

其實我原先都唔記得咗自己幾時開始寫Blog，剩係記得應該係 迪士尼黑色世界2011 完咗無耐。之前睇返呢個Blog嘅第一篇文章，原來係響2011年11月3日！即係聽日就已經係一週年啦！我今次唔講咁多感性嘅說話啦，因為之前300篇文章嗰陣都講過啦，我今次選擇做另一啲野。不過，都再向各位網友講多聲「多謝支持！」，因為冇你地睇嘅話，我真係唔會有動力寫落去。

假如狼人族勝出的話, 結局又會如何...?

呢篇文章原先係 狼人族 嘅招攬文章，係用黎計算黑色力量嘅，好可惜狼人族最後就輸咗…  大家睇完故事嘅最終章之後，有冇諗過假如終極一戰係由 狼人族 勝出的話，結局係點嘅呢？響 狼人族 輸咗之後，呢篇文章曾經出現「WE WILL BE BACK…」，狼人族 不忿嘅宣言。其實當中嘅意思，只係想幫我自己做鋪排，俾我之後可以發表埋故事另外版本嘅結局。我都唔拖咁耐啦，而家就為大家送上另一《黑色兩路》最終章，「狼人族的最後榮耀」！

---

殭屍詭姬 和 狼人戰臣 在半空中瞪著對方，他們二人都知道，勝利現正掌握在自己的手中；
在月圓之夜中，他們都盼望月光能夠為自己帶來力量，亦相信自己的特徵能夠協助他們獲勝。

2012十一月份焦點迪士尼朋友 - Buzz, Jessie & Woody

又黎到月頭啦！又有自製電腦桌布同大家分享！今次有 反斗奇兵 嘅三位 迪士尼朋友！分別係 巴斯、翠絲，以及係 胡迪，反斗奇兵 三套電影都咁出名，相信你一定識得佢地啦！點解今個月搵佢地呢？因為11月18日係 反斗奇兵大本營 嘅開幕一週年啊！好值得慶祝！

在萬聖節晚上遇見 怪誕復活狗!

昨日萬聖節，都講到本身諗過去樂園玩最後一次嘅 黑色世界，不過最後冇去，其實我係有野要做...  我夜晚上完堂之後就過咗銅鑼灣，一出港鐵黎到時代廣場，竟然俾我見到 怪誕復活狗！我本身都知道呢到有裝飾，不過過咗咁耐都醒唔起，同埋亦都唔係有太大興趣。

自創長篇故事 -《黑色兩路》最終章 - 殭屍的最後勝利

勝利誰屬，由你決定！最後大家都揀咗加入 殭屍黨，令 殭屍黨 得到較多嘅黑色力量！其實今次 殭屍黨 同埋 狼人族 的黑色力量都好接近，支持 狼人族 嘅朋友都唔需要唔開心。好啦，唔講咁多，而家就為大家送上《黑色兩路》最終章，由 殭屍詭姬 勝出嘅結局！

---

殭屍詭姬 和 狼人戰臣 在半空中瞪著對方，他們二人都知道，勝利現正掌握在自己的手中；
在月圓之夜中，他們都盼望月光能夠為自己帶來力量，亦相信自己的特徵能夠協助他們獲勝。